Ша,яран сувар-
Ша чи чилериз.
Хуш я рикlивай
Вун чи эллериз.
Ша,яран сувар-
Чаз савкьатар гъиз.
Чилерни цавар
Хьурай дамахиз.
Ша,яран сувар-
Гатфар атурай.
Ахъайна лувар
Чи рак гатурай.
Ша,яран сувар-
Шад хьуй зи гевил.
Атана зи яр
Кьаз хьуй и зи гъил.
Ша,яран сувар-
Чи кьисмет-кьадар!
Рикlерин варар
Жез тахьуй,чи-дар.
Ша,яран сувар-
Цlийи хьуй ругьер.
Хьуй,гудай чlавар,
Мурадрин-бегьер.
Ша,яран сувар-
Ша агакьа вун.
Гьал-агьвал жузаз-
Жив амай сувун.
Ша,яран сувар-
Чуьлдиз,арандиз.
Чир хьухь дамах квай
Жуван патанди...
Ша,яран сувар-
Ша чи макандиз.
Хабар яхъ чавай
Кlани-дакlанди.
Ша,яран сувар-
Руьгьдиз чи,тандиз.
И зи дегь чlаван
Лезги Ватандиз.