Вун гьинавай икьван ч1авал, к1анивал,
Зи уьмуьрдиз вучиз ик1 вун геж хьана?
Агьил яшдиз чанда гьатна жегьилвал,
Ашкъидин ц1ук алугна зи рик1 кана.
Эй цавун ц1ай, эй чилин рагъ, вучиз лагь,
Атана вун завай жузун тавуна?
Кьуразва зун, чразва зун ийиз агь,
Вучиз закай кьуьзуь Межнун авуна?
Вун зи хирел алах хьанвай кьел ят1а,
Я тахьайт1а, руьгьдиз мелгьем, к1анивал?
Уьмуьрд рекьел рагъ элцифай гел ят1а,
Я тахьайт1а, зи рик1ин т1ем, к1анивал?
Атана вун дагъдин вац1ун гур сел хьиз,
Акатна зун п1ирп1иш хьана аял хьиз.
Ак1ана вун нагагь рик1е са хьел хьиз,
Са ахвар хьиз атана вун, хиял хьиз.
Рехъ алатна амукьнайни яргъара,
Вучиз икьван вун геж хьана, к1анивал?
Тахьайт1а вун чуьнуьхнайни чарада,
Вучиз икьван вун геж хьана, к1анивал?