Бязи ксар чеб чпелай,
Жеда,я крар тийижиз.
Залпанд алатна тlишелай,
Лугьур,я гафар тийижиз.
Кlантla гатфар,кlантlа хъуьтlер,
Квахьна,я къугъун тийижиз.
Вили цава лув гур лифер,
Лекьни,я къузгъун тийижиз.
Ксайлахъди ийиз са хух,
Ахварай,я акур тийижиз.
Никlе хьайи нагъвар ва мух,
Вегьедай,я ахур тийижиз.
Я кар тийиз хьана къизмиш,
Гъейрибур,я чеб тийижиз.
Чпин крар хьайла дуьзмиш,
Цура,я мал-хеб тийижиз.
Гафунин ван къвезмач лагьай,
Кlвалах,я гьакl хуьр тийижиз.
Алемдин сан къаймах тахьай,
Михьидай,я куьр тийижиз.
Дуьнья хьанва алаш-балаш,
Ацукьдай,я къур тийижиз.
Уьмуьр акваз гьалар яваш,
Гьуьрмет,я хатур тийижиз.
Кьит хьанани кек ядай сар?
Хуьре,я дуллух тийижиз.
Марьямаз мад амачни кар?
Дувул,я къуллугъ тийижиз.