Камилова Гуллерадиз бахш яз.
Ахьтин гуьзел дишегьлияр ава чахъ,
Акур инсан гьейран жедай абурдал!
Эркекбурухъ галаз атIуз санал рехъ,
Фагьум-фикир ийиз вердиш сабурдал!
Яргъирушан нурар авай пелера,
Муьгьуьббатдин мелгьем авай вилера,
Гузан алай фу кьуна хьиз гъилера,
Мугьман, яр-дуст кьабул ийир хатурдал!
Амма чIуру ният аваз рикIера,
Дуьшуьш тахьуй, гьич уьмуьрдин рекьера,
Эркекри хьиз, гьахь тавуна йикьера,
Чпин намус хуьз алакьда гапурдал!
Чи лезгийрихъ дишегьлияр дамахдиз
Ферлибур я, амма викIегь кIвалахдиз.
Рахун ширин, земземдин цин булахдиз,
Чебни тамам, балугъбур я акьулдал!
Им тариф туш Сажидинан нубатдин,
Рахаз вердиш, мецел ширин набатдин.
Лезгинка кьуьл ийиз чидай гьайбатдин,
Рази жеч куьн тек са сефер акурдал!