Дустар к1ан я михьи рик1ин,
Ви вилерай рик1 аквадай,
Дустар к1ан я хьана к1вачин,
Ашкъидивди патав къведай...
Хурал мукьвал гъутар гьалчиз,
Дуст я лугьуз вав гъил гудай,
Сив хъуьредай сара к1асиз,
Фендигарар гьалт тавурай...
Дустар хьурай рик1 кудай чахъ,
Эркек, диши тафават туш....
Дустар хьурай чан гудай чахъ -
Дуст лагьай гаф зарафат туш...
Лайихлу тир къимет гудай,
Чинал авайвал лугьудай,
Писни-хъсан ваз ачухдай
Алатайт1а - рехъ къалурдай.
Санал т1уьр фан - къадир чидай,
Хъел атайла - сабур гъидай,
Мез верц1и вирт1едиз ухшар
Мадни хьурай куьн захъ, дустар