=Жегьилвилин ким=
"Фад алатай к1валахар,
Яд амачир булахар."
Сажидин
ФИТНЕДИН ГУМ
Гуж са кIвалах ава эхиз тежедай,
РикIиз кIани яр ви вилин кIаник хьун.
Амачирла са кар туьхкIуьр хъижедай,
Эй залум тир, дуьнья, ви чин кIаник хьуй!
Ийидачир и агь за сив ацIана,
ГъаначиртIа зун ишедай йикъал и.
Миргин кIвач кьаз кIанз, амма зи гъил кьацIана,
Им хьайи кар туширтIани мукьвал и.
Чун сад-садаз кIанибур тир эвелдай,
Фитнекарди чIурна чи кар туькIвенвай.
Зуз язава рикIел алай буьвелдай,
Чи муьгьуьббат хкадарна, куькIвенвай.
Чаз кьведазни хьанва хизан- аялар,
Амма уьмуьр физва рикIер туькьуьлдиз.
Гьа вилик хьиз садзаматIан хиялар,
Чи саданни шадвал амач гуьгьуьлдиз.
Чун сад садаз тамашзава яргъалай,
На лугьун чун ава душман уьлкведа.
ВегьедатIан чидач кьакьан чархалай?
Акваз, рахаз тежез, гьикьван къекъведа?
Фитнедин гум хьаначиртIа дуьньяда,
КIанибурун цуьквер гъидай тарари.
Чи кьисметдин къимет яраб куьн ятIа?
Къвез гатазвай марфарини харари.
Сажидин кьий, чарабуруз сирер гуз,
Регъуь кьванни тежер вичин яшаркай.
Икьван чIавал рикIел алай хирер куз,
Чуьнуьхнавай гадайрикай, рушаркай!