Дуьньядилай цIар илитIна, къекъвена,
Акуна заз рушар гьар жуьредин.
Валлагь дустар, зи кьил кьулухъ элкъвена,
Гьич санани акун тавур дередин,
Заз акурди Исфахандин бике я!
Юкь закIалдин, буйдиз шумал, абурдин,
Къугьдин гардан, хъуькъвер гьар сад анар тир;
АтIана зи рикIин кьарай сабурдин,
Икьван гуьрчег хьун Аллагьдин гьунар тир,
Заз акурди Исфахандин бике я!
Къекъведайла, къветрен саягъ лув гудай,
Квез акуна кIандай шад хъвер сивеллай.
Вав гвай дердер вшкъидив куз, цIув гудай,
Яргъи кифер галтад жез кьве къуьнеллай,
Заз акурди Исфахандин бике я!
Вилер чIулав, гьар са рацIам мукалдин,
Сив шуьрбетдин пияладин чешме тир;
КьелечI пIузар, чебни яру чумалдин,
Муьгьуьббатди багъишнавай наме тир,
Заз акурди Исфахандин бике я!
Яргъал Иран мукьва хьана къизилдин
Цуьк акур хьиз, атир авай булах тир.
РикI цIурурдай дуьшуьш хьайи жегьилдин,
Вичив гвайди женнет гьуьруь дамах тир,
Заз акурди Исфахандин бике я!
Кьей Сажидин, ваз акурди ахвар я.
Кьуьзуь кьиляй вилерикай карагай.
Ви шиирар къундармаяр, махар я,
ЦипицIар яз, атIай мегъуьн таракай,
Заз акурди Исфахандин бике я!