Къе аллагьди шадарна рик1,
Гьикьван вахт тир хьанвай гъарик1,
Яр хтана, рагъ хтана!
Руьгь ргазва яван хьанвай,
Мез рахазва тапан хьанвай,
Ашкъи кьакьан дагъ хтана,
Яр хтана, рагъ хтана!
Зулун пешер къизил - къизил,
Зурзаз кифер кьезил - кьезил,
Яр хтана, рагъ хтана!
Рик1ин къене ашкъид гелер,
Ахъайна захъ вичин гъилер,
Нямет ац1ай багъ хтана,
Яр хтана, рагъ хтана!
Гелериз кьий нахиш - нахиш,
Т1ебиатди ийиз алхиш,
Яр хтана, рагъ хтана!
Вилер хъуьрез милиз - милиз,
Заз килигиз гагь наз ийиз,
Къизилгуьлдин тагъ хтана,
Яр хтана, рагъ хтана!
Бес я, гуьгьуьл, ч1угвай гъамар,
Сагь хъжеда канвай хамар,
Яр хтана, рагъ хтана!
Илгьамд пери дерин - дерин,
Шагьвар галаз серин - серин,
Шаддиз макьам ягъ, хтана,
Яр хтана, рагъ хтана!