Ацукьнавай абур къуьн къуьне туна:
- Квез я ваз зун? – дишегьлиди жузуна.
Фикирна хьиз, умуд аваз вилера,
Къекъвена мад кас алатай рекьера-
К1анивилин гьиссер рик1е къугъвана,
Ахпа ада вичин папаз лагьана:
- Патав гвайла вун - алатда рик1ин къал,
Секин жеда чанда гьатай дерин т1ал;
Яргъал сятер са легьзедиз элкъведа;
Налугьуди женнет багъда къекъведа;
Лувар кутаз вуна цавуз акъудда,
Кьилел атай балайрикай хкудда…
Залан жедач кьурт1а гъиле заз дагълар…
Куьрел лугьун: куьз герек я гьак1 гафар?
Зи къилихрин ч1урудини къениди
Кьабулзавай баркалла ваз, к1аниди.
Ша, ацукьин чун гьамиша къуьн-къуьне,
Уьмуьр тухун к1евиз кьуна гъил-гъиле
Кьвед сад хьана физвай уьмуьр гьахълу я -
К1ан я заз вун - вахъ галаз зун бахтлу я…