Агь кьуьзуьвал, кьуьзивал!
ГьикI жеда зун рази вал?
Зайиф хьана вилерни,
Гьализ тазва айнаяр.
ТIа жез кIвачер гъилерни,
Жагъурзава багьнаяр.
Идалай виш сеферда,
Хъсан вахт тир жегьилвал.
КIамай кьадар кефердай,
Квазни такьаз агьилвал.
Аватайла тегьердай,
Ийизва вал пехилвал.
Къуват амач виликан,
КIвач галкIизва кIвачерихъ.
ТиртIани са великан,
Таниш гъерид кьечерихъ.
Гила каш-кашав текъвез,
Жезмач вилик хьиз къекъвез.
Залан хьана япарал,
Ванни къвезмач эверай.
Ихтибарна папарал,
ЭкъечI жезмач кIеверай.
Кая, кьея лугьунал,
Арза кьадай кас амач.
Мез сарарив чухунал,
Жузадай кас-мас амач.
Къведай базардин юкъуз,
Къачуна хьиз разивал,
КIанзава заз маса гуз,
Зур къиметдай кьуьзуьвал.
Адахъ галаз къугъвадай,
Сажидиназ вахт аван?
Кьуьзуьвилихъ югъвадай,
Заз мажални бахт аван?
За жуван кьуьзуьвал, гьеле совет гьукумат амаз, ужуз къиметдай къуншидиз ганай.