Лепе гала къилихрик,
Мудда къал ава.
Им гьи чIав я, гьи аям,
Худда фал ава.
Къени жибин, ичIи кьил,
Рахаз чидай лал.
Са гафунив лутуди
Гъариб тада гьал:
-АскIан, тупу мукьвада
Авунва запаб…
Вичи чара тавуртIа,
КIев жеда ктаб…
Эвел кьве гаф лагьана,
Авудзава рикI.
Ахпа жибин ацана,
Галудзава рикI.
МичIи кIвале чIулав кац,
Ийизвай кукIвар.
Сад жерягь я лугьуда
Хутазвай юкьвар.
Духтурдивай тагьайдаз
Авунвай чара.
Садан гъиле ток ава
Себеб тир пара.
Гьа и жуьре шумудан,
Ван къведа тариф.
Лутувилер чир тавур,
Жегьилвал гьайиф.
Зверзавай шивдикай,
Галудзавай як.
Лутуйриз къафун жез,
Акатмир сарак.
АлакьдатIа авурай,
И къелем татаб.
Фалчияр тапIрукь я,
Запабарни таб.