Зи багьади,агат зав, заз мекьизва,
Зи метlерал са геренда ацукьа.
Вун такурла гьиссер вири рекьизва,
Мугьман хьухь заз тек са йифиз амукьа.
Къугъвада зун ви чlарарив гьамиша,
Гьатта ксуд ви пак чlарар гъилеваз.
Йифериз на зи ялгъузвал бамиша,
Яшамиш жен бахт,муьгьуьббат рикlеваз.
Регъуь жемир,агата вун шаирдив,
Зи пlузарлай яру шараб хъухъ жуваз.
Вун садрани агудач за фикирдив,
Агат ая зи бедендив ашкъи гваз,
Агата зав,ви рикlе гьар жуьредин
Къизилгуьлдин таза цуьквер цада руш.
Вун атирлу са цуьк я зи дередин,
Мукьва хьухь заз, ваз кифер за храда руш.
Кукlун квез я кьена фидай уьмуьрда?
Уьмуьр гьалин гъил гъилеваз,шадвал гваз.
Тек ви суьрет къекъвезва зи фикирда,
Пlузарикай милайимдиз хъуьрез заз.
Зун кьисметди акъудайтlа яргъариз,
Вафалувал ашкъидиз хуьх гьамиша.
Къимет це на Владикан гафариз,
Акурла ам агат адав,саймиша.