– Ёньц аф сявса, кодама тон ават?
Мъзолфкяце пей алот люпштаф,
Нюретть панят сисем лихтибрява,
Ляпе валце кургозт кувондаф.
Сельмованфце модати пезф сюрокс,
Мольфце кельме вармаса уфай,
Шобда ваймозт шяйтатт кочкавсть пуромксс,
Сялгадомань эрьгяце кърфай.
Валхне ласькихть апак визтть кърхтапа,
И пильгалдост лиихть пяндрат-рдаст.
Кулемс «виденцяматне» пяк стакат,
Сяда тёждя мадомс кельме лазксс.
Эряф янгат лангсон ластя ардат,
Аф, аф ардат, тёждяста лият.
Арать тейне кенжалон пезф сярдокс, –
Тон ърьвязят, – мезьге аф тият.
Кяжень тумот стяфтоть седень кирдемс,
Ацать кяжень седяфста киякс…
Улень и улян тейть кельги мирдекс –
Монь шкайгисон аш кода лиякс.
– Вай, спасиба, полай, пара валозт!
Тянкса моньцтон кургозт сяпи марь,
Эльдень ашка – пекалдонь сюзялозт,
А тървазот – вазу траксонь карь.
Тунь ърьвакс тейть – кафтонкса канкс кандан
(Аф, аф эрян, аньцек мучендан),
Лувк, мзяра киза эсот андан,
Шини понкснень косьфнян-муськондян.
Тон хуш вестьке пянчфкя – фкяня – казеть?!
Тон эсь колгат аньцек пичедят.
Пряце таргозсь, аф тяльги мянь вазезт,
Сяконь содат: тетькат и удат.
Надияфтат – валхне наголь шавот, –
Седикуцюнязон тошнась сускф.
Кядень апак токафтт эсон шават,
Порят эсон, кода марень сукс.
Шини ведьса най валфт сельмомарьхне,
Телевизорт инголе нуват,
Пекцень вельф аф няйсайть пильгстот карьхнень,
Тонць эсь пряцень алякс коль луват.
Веть кърнат, кроватсь мянь шерьхки-лакай,-
«Лихтибрязень» валозь нюреннят, –
Эрь илядня ваксозт мадан сяка…
Мирдезят тон – мезьге аф тият.
Улень и улян тейть кельги авакс
(Кельгомга въдь лисень тейть ърьвакс!) –
Тяфта ни шкайгизе, няк, бъславаф, –
Нать, аш кода мондейне лиякс.