Гъурбатдавай атир галай цуькверлай,
Валлагь, багьа я ватандин къалгъанар
Ухшар я чун алатайдаз рекьеллай -
Хайи чилихъ ц1игел хьанвай инсанар...
Ватандин т1ал ава лугьуз зи чанда,
Ялда вичихъ Лезгистандин эверди....
Гьар иер гаф заз шиирда тваз к1анда,
Нур гуй лугьуз зи илгьамдин бегьерди
Рик1 ц1разва, зи вил хьана дидедихъ
Хайи хуьруьхъ - рик1из чими дигедихъ.
Шур-шурдин ван япарава булахдин,
Заз махпурдал къекъвез к1ан я яйлахдин...
Каспи гьуьлуьз салам гуда Невадлай:
(Адаз за гаф ганавайтир лап фадлай)
Эвер гуда за, дустар, квез Мамрачдал,
Ша, ахъайин шииратдин са к1ват1ал.