Эвел дагълар авудзава ракъини,
Кьакьан цава ахварзавай ширин тир.
Гьич садавай тІалабзавач гьакъини,
Инихъ мана-метлеб ава дерин тир:
Дагълар тушни чун саламат хуьзвайбур?!
Виридалай мукьва каср Аллагьдиз.
Кьакьан дагълар, икрам ийиз саймиша!
Муьтуьгъ тушир са шагьдиз, са пачагьдиз!
Ахпа яваш-яваш вичин экуьвал,
Гуз эгечІда ракъини пак чуьллериз.
ЦІурур ийиз цава амай мичІивал,
Экв экъичда ахваррик квай вилериз.
Ван къачуда, виликди физ, вацІари,
Йигин жеда лепеярни гьуьлерал,
Гарар ашукь ийиз таза къацари,
Ничхиррин ван акьалт жеда чуьллерал.
Зун мягьтел я ракъинин терс къилихдал:
Садбур куда, садбуруз гуз чимивал.
Кьил элкъуьрна цІун ялавдин сирихдал,
Ни ганатІа адаз икьван къенивал?
Миллиардрин девирра куз алемда,
Вирибуруз бахшзава вич цІай хьана.
Хкахь тийир Экв Аллагьдин Къелемдал,
Чаз адакай мергьеметдин пай хьана.
Мягьтел жемир, Сажидин, вун ракъинал!
Чешне къачу ракъинлай гьар кІвалахда.
Зегьмет чІугу, вил тахьана гьакъинал,
Садрани кІан жемир гьатиз дамахда.
Хайи халкьдин шииратдин рагъ хьана,
Илгьамдин цІай куькІуьна куг ви чандал!
Кьил цава яхъ, шииратдин дагъ хьана,
Дамах ийиз жуван халкьдал, Ватандал!