"Кьакьан синел за сил цада..."
(Халкьдин ч1аларай).
Зун хайид я Лезгистанда- маканда,
Халича тир беневшадин цуькверин.
Фикирдайла кьисметдикай Ватандин,
Заз акуна ишигъ яргъал экверин!
Гатфар бере зун дуьньядиз атана,
Бегьер патал тум к1вахдайла ник1ериз,
Уьмуьрди зи гъиле къелем вугана,
Къуват гана гьевесдизни гьиссериз...
Зун жегьил яз, гьазур тирла женгериз,
Вилик фирла,жуван гъилер къакъажна,
Кьуьд агатна,маргъалар гваз живедин,
Келлегуьзрин саймазвили агажна.
Жуван халкьдин вафалу тир векил яз,
Лазим тирла экъеч1ун вун майдандиз,
Акур ч1авуз къе мад зи рик1 сефил я
Фугъараяр, элкъвенавай гьайванриз.
Сад хьун патал са гъил кьадай чкадал,
Сада масад алахънава кьац1уриз,
Хайи стха пехил хьанва стхадал,
Вичин руфун алахънава ац1уриз...
Агъуздайла яд касди вун - сабур хуьз,
Жува жуван тарифардай чкадал,
Гьар камуна хайи чилин абур хуьз,
Хва тирди вун къалур лайих крарал.
Чи бубайри несигьатдин гафарал
Чаз,веледриз, зурба акьул гайид я!
Яб це садра: Халис Лезги - намусди,
Ц1егьни, чумахъ галукьайла, кьейид я!
Вун аял яз,кутаз еке умудар,
Архайри вун хкажай тир гъилерал,
Лезги чилин, дидед къадир хьаначт1а,
Вучдай вакай атана и чилерал?
Мад сеферда, бамишдайла хъуьт1уь зун,
Рик1 дагълариз чук1урда за к1усарна,
Гатфар кьиляй белки лезги рушари
А зи рик1ин к1усарикай к1унч1арда.