Я ЛЕЗГИ ХВА, Я ЛЕЗГИ РУШ
Къариблухда югъ яни хуш?
Жезвани квез незвай фу нуш?
Залан тIалар хьанвай аруш
Ватандивай къакъатнавай,
Я лезги хва, я лезги руш...
Аквазвачни квез ахварай,
Жезвачни ван ийир гьарай,
ГьикI къвезва квез ана кьарай,
Ватандивай къакъатнавай
Я лезги хва, я лезги руш?
Бубад кIвалин чкIиз цлар,
Гуьрцелдалла къалин чIурар,
Хайи чилиз жезва ялар,
Ватандивай къакъатнавай
Я лезги хва, я лезги руш?..
"Пул" тIвар алай чIуру гъуьлягъ,
Акъудиз на вири кьиляй,
Физва чIиб-чIиб ватан гъиляй,
Ватандивай къакъатнавай
Я лезги хва, я лезги руш.
Дагъдин хурал хуьрер етим,
Акъудрай ни къулариз чим?
ЦIигел я квехъ жигъирни ким,
Ватандивай къакъатнавай
Я лезги хва, я лезги руш...
Чи дагълари хуьзва куь рехъ,
Бубад кIвалин куькIуьра экв!
Хьухь ватандал цIайни-цIверекI,
Ватандивай къакъатнавай
Я лезги хва, я лезги руш!
Къариб чилел гур-авадан,
Зар-зибада хьайтIан ви тан,
Гъурбатдикай жедач ватан,
Ватандикай къакъатнавай
Я лезги хва, я лезги руш!
октябр, 2014