"Ярдин чарар" циклдай...
Гьуьлуьн кьере лап йифелди амукьиз,
Къайи къванцел вун рикlеваз ацукьиз,
Ви шиирар ктабдай за к1елзава,
Вун такваз за гагь-гагь яргъал шелзава
Вучиз АЛЛАГЬ,зун и йикъа гьатнава?
Чи муьгьуьббат чавай яргъаз катнава?
Хабар авач зи ярдиз зи гьалдикай
Вич такваз зи рик1е авай т1алдикай.
Ви ктабдин гьар чинрив зун рахазва,
Ви гафари зун ч1улунал гатазва.
Гьайиф,гьайиф,акъайна вун гъиляй за.
Амма, зерре акъайначир рик1яй за.
Зун акваз къе секинсуз я лепеяр,
Чун кьвед къекъвей ацахьзава гуьнеяр.
Ирид йис я вун зи вилиз такуна,
Зи гьалдикай ерли хабар такьуна.
Ваз к1ан хьайдал за кьадарсуз дамахна,
Аман Аллаh, агь,за вуч пис к1валахна.
Заз чидачир ихьтин эхир жедайди,
Чи к1анивал бахтсузвили недайди.