Са алимдин къвалав жегьил атана,
Хабар кьуна, " вучиз эллер пашман я?
Михьи булах агъудивди ац1ана,
Гьар са югъ чал алук1завай кафан я."
Экуь вилер гадад чиниз хкажна,
Алимдин гъил фена рехи чурудлай:
"Гунагьри чи фирягь рик1ер агажна,
Яшамиш жез им девир я шумудлай!
Чи вилик кьве лиф атанва - килига,
Вилид, лацуд, лув гуз къугъваз кьегьалдиз.
Гила абрун вилик са твар эцига,
Жаваб вуна жагъида ви суалдиз."
А лиферин юкьуз са твар вегьена.
Алимдин гаф гадад кьилиз тухвана.
Ислягь кьве лиф, кьве вагьшидиз элкъвена
Гьа сятда руг-чаквал цава къугъвана.
Чинар кьунва хирерини, ивиди,
Ажугъдивди мискьин рик1ер ац1анва.
"Я зиди къе жедач а твар, я види!"-
Гуя абру сада садаз лагьанва.
Амма къаргъа килигзавай хилелай,
Вичин кьиле зулумат кар гьазурна.
Лув гана, твар к1уфуф яна чилелай,
Тум юзуриз, хъуьрез, цавуз чкурна.
Явашдаказ биришри кьур капарив,
Накъвар михьна, алимди кьил агъузна.
"Чир хьухь жегьил, фурсар гава халкьарив,
Гъейрат намус фит1едилай ужузна.
Акунани, авур кар кьве ахмакьди,
Гьуьрмет кана, нефсинив тахт вугана.
Гьак1 халкьдини жаваб туна яракьдив,
Секинвалнви шадвал дибдай ат1ана."