ЦIИЙИ АШКЪИ ГЪУЦАРИВАЙ ТIАЛАБНАЙ
ЦIийи ашкъи гъуцаривай тIалабнай,
Мад вучиз вун акъвазнава вилик зи?
Шумуд йисуз зи эвердиз ганач гьай,
Агакьарнач на ви гъилер гъилик зи.
ЦIийи ашкъи кIан хьанай заз худадвай,
Ви тIвар алай рикIин суза атIуз кIанз.
Акъудиз кIанз гуьгьуьлдавай живед къай,
Саф ашкъидин дад вуч ятIа кьатIуз канз.
Ваъ! Мад вун я экъечIнавайд вилик зи,
Мад вуна зав дуьня гузва кьеженвай.
Эй ашкъидин гамунавай цIилихъ зи!
Чаравилин тIвар зарарив кхьенвай...
Вун килигиз акъвазнава вилик зи...
За мад гуьгьуьл жигарна вав гьикI вугун?
"ЧIалах туштIа, на вилериз килиг зи..."
Къвазнава вун ванцихъ галаз са зурзун...
ХкIурмир хер алай рикIин кьилик зи,
Чун эбеди чара хьанва са-садвай.
Мад вучиз вун акъвазнава вилик зи?
ЦIийи ашкъи тIалабайтIан худадвай?...
10.10.2005