Лугьузва къе, квахьда зи ч1ал,
Гьихьтин завал и кар я,
Амукьдачни чун, лезги халкь,
Ч1ални халкь са гафар я!
Я, лезгияр, чи дамаррай
Лезги иви физмачни,
Михьи т1варц1ел гъиз и леке,
Чахъ ягь, намус амачни?
Эвезна низ азиз ширин
Дидед лайлай тахайда,
Лагь,хциз ни Шарвилидкай
Маса ч1алал ахъайда?
Фагьум гьарда, къенин и ванм
Гьатунин вуч ят1 себеб,
Къагьриманрин турар гвайбур,
Квадардани къулни кьеб?
Ваъ, пак Шалбуз, Шагьни аран,
Кьулан вац1-сагъ тежер т1ал,
Эминан мез, лекьерин кьуьл
Маса гуч за, эциг ц1ал!
Гьажибега Печорадал
Гьарфарихъ чан ганачни,
Алибегни Алирзани
Гаф паталди каначни?
Гзаф я чун ватанперес,
Вафалубур ерийриз,
Весийризни тур бубайри
Тадай чна бегърийриз!
Инанмиш тир лезги рушан
Сес виридахъ галукьда:
Къадимдилай рахай зи эл
Ч1ал эбеди амукьда!