Гамзат Усманов.
Я бахтавар сару билбил,
Низ хьурай бес и зи къадир?
Жагъин тийиз ц!ару серин,
Мани лугьуз жедани бес?
Акурлахъди хъижез рик! т!ар,
Гъиляйни зи тефиз са кар,
Хажалатдив хьанва хур дар,
Мани лугьуз жедани бес?
Тум галачир жедач дергес,
Вуна фикир мийир, мирес,
Тахьайла вахъ ашкъи- гьевес,
Мани лугьуз жедани бес?
Яр такуна шумуд йисар,
Акъатиз физ гьикьван варцар,
Жаваб тагуз физваз йикъар,
Мани лугьуз жедани бес?
Хьайила вахъ пара дердер,
Рик!е туна хуьзва сирер,
Накъварикди кузва вилер,
Мани лугьуз жедани бес?
Залан парар гьатна хиве,
К!анидан дерт аваз рик!е,
Ц!ай хьайила жуван къене,
Мани лугьуз жедани бес?