Загадкi на беларускай мове 1

   
   Цюк ды цюк !  Дзяўбе ў сасне
   Дзірку нехта па вясне.
   Ад яго ў кары чарвяк
   Не схаваецца ніяк.
                (дзяцел)

   Ходзіць па балотах
   У чырвоных ботах.
   Доўгай дзюбай хват
   Ловіць жабянят.
                (бусел, бацян)

   Расцвілі на кветках кветкі.
   Іх угледзелі ўсе дзеткі.
   Як сарваць іх захацелі,
   Кветкі порх - і паляцелі.
                (матылькі)

   Сонейка ад усіх закрыла,
   Кветкі у садзе напаіла.
   І далей пабегла шпарка
   У сінім небе. Гэта ...
                (хмарка)

   Пых ды пых пад кустом,
   Пад зялёным лістом
   Пакаціўся клубок -
   Накалоўся лісток.
                (вожык)

   Соладка мне з ёю спаць,
   Казачныя сны чытаць.
   Палажу яе пад вушка.
   Вельмі мяккая ...
                (падушка)

   Сагрэе ў халодную сцюжу,
   Накорміць гарачым абедам,
   Сама ж яна есць толькі дровы
   і грэе спіну ў дзеда.
                (печ)

   Усе яго завуць, гукаюць.
   Усе ад спёкі паміраюць.
   Ветрык як яго прынёс -
   Пад страхой хаваюць нос.
                (дождж)

   Працаўніца жвавая
   Ў кветачках лятае.
   Ласункі духмяныя
   Лапкамі збірае.
   Калі захварэем мы
   Восенню, зімой,
   Чаем з тым ласуначкам
   Лечымся з табой.
                (пчала і мёд)