ВАХТ АЛАТУНИВАЙ НУР ГУЗВАЙ ИНЖИ
Квез, эгер куьн садлагьана къарибдаваз, чи дагълар, вацIар, жерг ягъана акъвазнавай къацу гуьнеяр, пелер акваз кан яни?
Квез чи халкьдин руьгьдин къадим гелер, адан рикIин тIалар, гуьгьуьлдин такабурвал акваз канзавани?
Чи булахрин верцIи аваздихъ яб акализ, чи чилерин, накьвадин этир гьихьтинди тиртIа рикIел хкиз, аял чIаварин верци, экуь, рагъ алай йикъариз хъфиз канзавани?
Вилер мичIна Рагьимат Гьажиевадин ванцихъ яб акала.И ванцяй чи халкьдин манийриз яб це. Са-са манидиз. Чи халкьдин талантдал, адан гуьгьуьлдин вардал гьейран жеда куьн. И манияр акьван кьакьан дережада туькIуьрнава хьи, налугьуди ибур адетдин, савад авачир инсанри ваъ, чIехи гениал са талант авай касди арадал гъанвайбур я.
Лезги халкьдин манияр ва Рагьимат Гьажиевадин иер, мисил авачир ван.Налугьуди чи халкьди и манияр Рагьимата лугьурай лугьуз, гьадан ван патал туькIуьрнавайди я.И ванциз яб гудамаз акI жеда ваз, налагь, маниярзавайди инсан ваъ, чи пелер, гуьнеяр я, булахар, вацIар я, цуьквер, тарар,тамар, ракъинин нурар я маниярзавайди. Чи халкьдин руьгь я маниярзавайди. Садни ваз акI жеда хьи, чи халкьдин манияр са Рагьимата лугьун бес хьиз.
Чи халкьдин руьгьдин хазинадин лап иер жавагьирар чи махар, чи бендер я, Етим Эмин, СтIал Суьлейман я, чи манияр, чи кьуьлер, макьамар, мехъерар,мелер я, садни Рагьимат Гьажиевадин ван. Тикрар тежер, булах хьиз саф, михьи ван.Аллагьди бахшнавай чIехи са хазина я и ван чи халкьдиз. И ван вахт алатунивай нур гузвай инжидиз ухшар я.
Булахдал акъвазай геренар ви уьмуьрдик акал жеда, лугьуда бубайри. Ваз ви уьмуьрдик гзаф иер, сир квай, ажайиб геренар акал хьана канзаватIа, ваз ви руьгь михьи ийиз канзаватIа, Рагьимат Гьажиева тIвар алай булахдал вач, адан ванциз яб це.Эгер ваз ви чандай мангуртвилин амай-амачир кIусарни акъудна гвадариз кIанзаватIа, и тIвар алай инжидин рекIв-рекIвдиз килиг. Ви вилериз экв, ви рикIе нур гьатда. Ваз вун гьибуркай ятIа, гьим ятIа чир хъижеда. Ви рикIел ви хайи эл-уба, хайибур хуькведа. Ви руьгьди лекьре хьиз луварар генг ахъайна цавун аршда азаддаказ, шаддиз, такабурдаказ чалаг ягъада. Ваз акI жеда хьи, ви ругьди Шагьдагъдин кьакьан кукIушдилай элкъвез хайи ватан сейрзава. Рагьиматан ванци суьгьуьрдин кист гвай чIехи са чIугварди хьиз хайи чилин вири иервилер, акунар чи вилеркай карагарзава. И ванци гуьзгуьди хьиз чи халкьдин руьгьдин кьуват, варлувал къалурзава. Садни и ванци вичин сагьибдиз-Рагьимат Гьаживадиз ахьтин гуьмбет эцигнава хьи, ам гьикьван вахтар, чIавар алатайтIани гьа авайвал амукьда. И ван чи дидед чIал хьиз, халкьдин манияр хьиз, Етим Эминан шиирар хьиз иер ва эбеди я.
Иер ва эбеди.
19.01.2002