Чун мад расал хьана, мад къакъатдани?
Им я жал чи бахтар, чи кьведан кьисмет?
Низ чида, чаравал хьун герек яни,
Гун патал гьиссериз лайих тир къимет?
Канивал ахвар я, лагьана вуна,
КичIезва, верцивал фад физ aлатна.
Ацукьин секиндик гъил гъиле кьуна,
Лугьудач за амма хъфин, галатна.
Пагь, гьикьван иер тир - варз акъатнавай,
Хъуьрезвай гъетерни, гьа ви вилер хьиз!
Чи руьгьер сад садав гьикI агатнавай,
Гьуьлуьк какахьзавай вацIун селлер хьиз.
Легьзеда мурадри ахъайнавай цуьк,
Лап чиз-чиз шуьткьуьда тIимил чIавалай,
Чун кьведни, азизди, акатнава цIук,
ЦIелхемар алахьиз физва къавалай…
Гьайиф, чIав атана, чун мад къакъатна,
Хиялра ви гафар, чанда цуз ама,
Амма са хушбахтвал зи рикIе гьатна,-
Ви гъилин ифинди зи гъил кузама…