Баркаван ник, ц1ай куьк1вена бубуйрин,
Кузва сад хьиз, тешпигь хьана шикилдиз.
Куьз ят1ани бубуйрин чуьл акурла.
Сифте темен, вун къвезва зи фикирдиз.
За гъил кьурла, кьил са патахъ авуна,
Яр кткай чин к1евирнай на ч1арарив.
Зун, лалди хьиз, тунай на, мез кьурурна,
Чка кьунвай рик1е агъзур ч1алари.
...Ахъа жезвай бубу хьиз ви п1узарарар
На зерифдиз агуднай зав сифтедай,
Пагь, абура ашкъид ялав къекъвезвай,
Акъатзавай кузвай рик1ин дегьнедай!
Ви темендин ялавди зи беденда
Туьхуьн тийир ашкъидин ц1ай кук1уьрна.
Зи уьмуьрдин гуьт1уь жигъир-рекьикай,
Вун себеб яз,къе за шегьре туьк1уьрна...
Гьар сеферда бубуйрин чуьл акурла,
Шад гьиссери лепе гуда рик1е зи.
Зи мурад я, бубу цуьк хьиз, азизди,
Акун даим вун ашкъидин ник1е зи!
1994