***

Куьре Абид
Им пуд югъ тир вун такуна вилериз,
Зи ашкъидин цава гъед яз куьк1венвай.
Са к1валахни муьт1уьгъ тежез гъилериз,
На лугьуди, экуь рагъни туьхвенвай.

Къе, бейхабар вун зи вилик акъатна,
Махарик квай хумай къуш хьиз, т1авус хьиз.
На лугьуди, рагъ чилерал аватна-
За гьиссна вун адан кузвай са к1ус хьиз.

Агатизни кич1езва вав, к1вачери
Куьз ят1ани, ви патав зун тухузва.
Ви ашкъиди авуна зун куьчери,
Вун акурла рик1и мани лугьузва.

Мус зи к1вале вун чирагъ яз куьк1уьнда,
Кайи рик1ин сад эрзиман-мурад яз?
Мус рик1ерин багьа гафар луьк1уьнда?
Мус яргъи киф арушда зал, инад кьаз?