Легьзеда цав кьуна, чIур хьана гьава,
Саки вун къакъатна, лугьуз, хъилериз.
ДакIардай рекьериз за килигзава,
Кьулухъ элкъвез-элкъвез, на тур гелериз.
Яман гьайбат гала чIулав циферихъ,
Зулун иервилер гатазва гару
Гьисерив ацIанвай яргъи йиферихъ
Яраб, вунни цIигел жедатIа,кару?
Мурк хьтин, шуьшедал алкIурнава пел,
Хиялриз ракъурна ванци марфадин,
СтIалри къвердавай агудзава шел,
Ягъизва зун патал соло арфадин.
Яраб, ваз къвезватIа ван и манидин,
Яраб, ви рикIел зун исят алатIа?
Лугьуз, дарих я зун вахъ гьикI, кIаниди,
Вунни ви дакIардин вилик галатIа?