Гьинай рикIел атай, вун къенин йифиз,
Чандик фул акатна, ахвар атIана,
Туьхуьзвай къулариз чим гуз ифириз,
Зи руьгьдин дакIарар мад на гатана.
Гагь хъуьрез, гагь пашман, гагьни хъел аваз
Рахазва захъ галаз вун, хиял хьана,
"Лагь и канивили вуч ганатIа ваз,
Вун патал зун вуж тир?" - суал гузва на.
Шуьткьвена марвар хьиз зун къай галукьай,
Амма зулун гарар байихнач вуна!
На заз варз лугьудай, цIийиз алукьай,
Вилерин накъвар заз савкьат амуькна…
Гьахъ я вун, чи бахтар цIраз авахьна,
Садаз сир ахъайиз амма алахънач.
ТIурфанра, гарара гьикI кьил какахьна,
Садаз шикаятнач, садаз за агьнач.
Жегьилвал фена фад, мад зун агакьнач…
Йикъар балкIандаллай, зун амукьна ях,
Гьижрандин часпарар атIуз алакьнач,
Туна чаз йисари ашкъидикай мах…