ЗА ВАЗ ИКРАМЗАВАЙ
(прозадин шиир)
За ваз икрамзавай.Са гъуцраз хьиз, аллагьдиз хьиз. За рикIе ваз имаратар хкажнавай.Гъуцариз хьиз, аллагьриз хьиз. А имаратрин кьакьан кьацIара ви тIвар хуьзвай гъил аладариз.. Гъуцарин хьиз, аллагьрин хьиз.
РикI хуравай за акъудна ваз къалурна, жуван гъилив къурбанд гана ваз, са гъуцраз хьиз. Кьабулна вуна. Амма ви рикI вав гумукьна, жував хвена. Гъуцари хьиз.
Вун виняй агъуз килигна заз. Гуцари хьиз.Гьикьван за эверайтIан, гьай ганач на. Гуцари хьиз, аллагьри хьиз.
Зи рикIе ваз хкажнавай имаратар ичIи хьанва, мичIи хьанва вун галачиз.Ялгъуз я зун, тек къвекъвезва зун зи рикIин харапIайра. Гагь кузва зун, гагьни мекьизва заз, зурзаз ава зи рикIевай ашкъидин харапIайра. Вун галачиз.
Заз гъуц амач, низ икрамда?
Бес вуна низ икрамзава, зи азиз гъуц, зи залум аллагь?
04.08.1991