Шовзткъа диълаг1а шу дар додаж,
Сафар бетта т1ехьар кхаьра,
Г1ийла керара дог делхдеж
Адам дара мехках даькха.
Фу бахьан да? Сен бахь бала?
Саг ханвац из ловж хьаала.
Бераш,кхалнах,къоаной- цхьанна
Кхувсар фусамашкар ара.
Къиза, дорха т1ехьара тетташ,
"Ар довл!"- яхаш ц1ог1 а детташ,
Сецца ц1аг1ар ара даькха
Дигар вай къам мехках даькха.
Делхдеш мискач наьха дегаж,
Лоамашт,аренашт т1а г1олла
Екаш хоз г1айг1ане назам
Д1ахьош мискач наьха лазам.
Шийлач 1анна, бирса 1уйран
Делхаш бераш дехка марх,
Ц1ермашенашка чу а бехка
Бигар Сибре миска нах.
Моастаг1ашца т1ом бе баха
Ц1аг1а бацар ц1енна дей
Х1аьтаъ цхьакха даь хьам доацаш
Мехках даькхар адам вай...
Дицлуг доацаш дегашт ц1акхаъ
Даькхар къамо кхойта шу.
Тахан санна б1аьрга белхбеш
Керд йа къаман дега чов.
Везан Даьла, даькъал белахь
Са Г1алг1айче-къона мохк!
Деха хьуга: машар болаш
Парг1ат бакха са даймохк!