Гъуьл четиндиз ч1угваз нефес,
Юлдаш шехьиз ацукьнава.
К1валин къене ясиндин сес,
Ажалдин вахт алукьнава.
Гъуьлуь кьуна юлдашдин гъил,
Лагьана, вун пашман я хьи.
Шехь ийимир чан зи къизил,
Ви хъвер чандиз дарман я хьи.
Накъвари бес кузва зи рик1,
Мад зи сивел хъжедач хъвер.
Вун галачиз дуьньяда гьик1,
Акъудда за йикъар-йифер.
Чан к1ани яр, уьмуьр ахвар,
Зун ахварай аватзава.
Кьисметнавай йисар-йикъар
Акваз-такваз акъатзава.
Туьхуьзва зи шадвилин нур,
Аман чан гъуьл язух хьана.
Заз эгъуьрай ажалди сур,
Ваз агъзур йис артух гана.
Вун сагърай яр, бес гьар ч1авуз,
Баладихъ хьиз гелкъведай захъ.
Зи сефилвал дибдай ат1уз,
Хъуьрез-хъуьрез элкъведай захъ.
Гьамиша рик1 чимиз патав,
Са малайик жедай азиз.
Муьгьуьббатдин экуь ялав,
Гьикьван гана гъуьлуьн рик1из.
Зун тирт1ани кесиб лежбер,
Шадвал гъидай лувар тир вун.
Сагъ хъийидай гьар рик1ин хер,
Хъут1уьхъай къвер гатфар тир вун.
Муьгьуьбатдин чирна заз дад,
Дуьньядал тун дуьз туш чан гъуьл.
Накъвари рик1 ийизва пад,
Уьмуьр бахтсуз хьанва туькьуьл.
Шехьмир я паб, тазва за чил,
Гила зи к1вал сур я, чан яр.
Ви мет1ерал эцигна кьил,
Чан гуз зун гьазур я, чан яр.
К1ани ярдал алаз вилер,
Акъваз хьана гъуьлуьн нефес.
К1вале гьатна гьарай эвер.
Хкаж хьана шехьунин сес.
Регьметар гуй, фекьид сивяй,
Акъатна гаф ажеб агъур.
Папан рик1ик акатна ц1ай,
Кана кабаб ийизвай хур.
Шехьиз-шехьиз эцигна кьил,
Гзаф ширин гъуьлуьн къуьнел.
Гьарайна, я ажалдин гъил,
Вучиз яна зи чандиз кьел?
И йифяй зун акъат тавуй,
Вун зи к1вализ мугьман хьурай!
Зун ярдихъай къакъат тавуй,
Къуй женнет чи макан хьурай!