Канда заз а чIарар, авахьиз фидай,
Шагь суван дамах тир булахар хьтин,
Канда а пIузарар, заз илгьам гъидай,
Цуькверин атир квай къаймахар хьтин.
Канда заз килигун, беневшади хьиз,
Гатфарин эхирда гардан къвалахъна.
Канда заз а хъуьруьн, ухшар цавариз,
Яргъируш акъатдай марфар алахьна.
Канда заз а хъуьхъвер, экуьн яр хьтин,
Ярувал алатдай, гьар зун акурла,
Канда заз а вилер, къизил зар хьтин,
Хъуьредай ашкъидив, зи вил акьурла!