КАРХДАЬЛЧА ВАЙН А
Денден вешина Селамханна
Тезетан къепехь ю эвла,--
Д1аваьлла юьртара стаг.
Цо б1аьргийн нег1арш т1екъевли
Дахарна веллачохь хаг.
Шаьш эриг нийса а хеташ,
И валар дийцаре до:
--Шен оьмар текхира цо вецаш.
--Х1умма а-м ца даьхьи цо.
--Цо даьхьна, дахьийна дац ткъа
И воьвзаш мел хилла дог?
--Ишттаниг лан атта дац-кха;
Барма хьуш тийсало ког.
--Хьажахьа, селхана ду-кх тхойша
Веача балхара ц1а.
"Т1ахъаьлла" ша хилар гойтуш
И тхоьца балбоккхуш 1ар.
"Воккхастаг, воккхастаг"--бохуш
Кегийраш, къанви-кх аш со",--
Г1евттича, охьахаар доьхуш,
Трамвайчохь аьллера цо.
Цо хьоьстуш догъэцна бераш
1а, ловзарш совцийна шайн;
Хиламаш охьучу хьерахь
Кхохкарийн галеш дац дайн.
Шайн кет1ахь хоий и 1ара,
Хьоьрсуш шен забарийн нур.
Цхьаъ цхьаьнга лийначохь хьарам,
Х1уттура нийсонан мурд.
Ткъа вала оьшучохь орцах,
Д1акхочий хуьлура и.
Хьовзура шен г1оран г1оддах,
1овшура вуонан ах стим.
Тахна ю тезетахь эвла,--
Д1аваьлла юьртара стаг.
Цо б1аьргийн нег1арш т1екъевли,
Дахарна веллачохь хьаг.