ЦОККУЕВ 1илмади
ИШТТА ДУ-КХ И
Цхьаволчун юьхь т1ера
Маьлхан нур г1уьтту,
Вукхуьнан юьхь гича
1уьйкъан хан х1утту.
Цхьаволчун куьг 1овду
Шовкъ ца лайаллал,
Вукхуьнан куьйгах и
Хьакхадо халла.
Цхьаволчун ницкъ кхочу
Нийсо, бакъ толо,
Вукхуьнан--буххенца
Цо динарг дохо.
Цхьаволчун ц1ийх ду и,--
Халкъана вацар,
Вукхуьнан куьйгаш ду
Пайденна 1ахар.
Цхьаволчун массар а
Къобалйо т1амарш,
Вукхуьнан даима
Дашо бу к1ажаш.
...Цхьаволчун валар а
Беркате доьрзу,
Вукхуьнан дахар ду
Зуламех доьзна.
Доттаг1ий,
Хилий вай
Хьалхарниш санна?--
Дуьненан дозалла
Т1ехь лаьтта царна.