Неда, къвада гьарам зат1ар за гьамиша шириндакваз, Дуствиликай, касвиликай тостар лугьуз хуш къведа заз. К1валах к1еве ак1ай ч1авуз, жуван чандал чан аламаз, Ярар, дустар дарда туна хелвет катдай заман я къе! Виждан, гъейрет маса гана девлет к1ват1дай заман я къе!
Дуст жибин я, пулни далу, вун инсанрал ч1алах жемир, Зегьмет ч1угваз, шурни фу нез гьахъ гафарал алдах жемир, Эрекь, чехир хъун тавунвай и патара булах тамир. Лугьумир хьи, нефсет1 я зун, чара ат1ай заман я къе, Виждан, гъейрет маса гана девлет к1ват1дай заман я къе!
На институт къутяхайт1ан, акьул къведач а ви кьилиз, За кьве класс к1елнавачт1ан, йикъа къвезва рузи гъилиз, Абур, гьая вуч зат1ар я? Регъвуь жедач и зи чиниз. Илим, савад тур на жуваз, крар кьац1ай заман я къе, Виждан, гъейрет маса гана девлет к1ват1дай заман я къе!
Къенин юкъуз лезги ч1алал к1елун-кхьин айиб кар я, К1валин къене урус ч1алал "общаться" жен важиб кар я, Хтулризни дидед ч1ал ваъ, и ч1ал чирун зи икърар я. Лекьер кьена девран хьана пехъер хтай заман я къе, Виждан, гъейрет маса гана девлет к1ват1дай заман я къе!
Везифаяр къачун патал зун чарадаз лап лук1 жеда, Гишин хьана лекь жедайкьван ац1ай багъда лап нуьк1 жеда, Варлу касдин к1аник квай джип машиндиз шуруп1 жеда. Эгь! Дак1ан я жуванбур заз, бахтар хтай заман я къе, Виждан, гъейрет маса гана девлет к!ват!дай заман я къе!
Алпан, Алпан лугьуз куьне зи "мозгияр" мийир харап1, Цайлапанди ягъурай куьн, вилер хьана ц1арап1-ц1арап1, "Современны" девир кеф я, а Шергиран амач к1араб. Халкь ахвара ава к1еви, жибин ац1ай заман я къе, Виждан, гъейрет маса гана девлет к1ват1дай заман я къе!