Гьич садрани алудмир на рикIелай,
На заз гайи тIал зи рикIе амукьда.
Анжах вуна нагъв гъиз тахьуй вилерал,
Дерт зи рикIихъ са хьел хьана галукьда.
Зи багърийри хкажна хьиз къуьнерал,
Тухудайла мягьфедаваз суруз зун.
Гьар са касди накъвар алаз вилерал
Авуддайла мидаим яз фуруз зун,
Гьа чIавузни, зи азизди, ширинди,
Ашкъидин тIал. агь, зи рикIяй акъатдач.
Магьрум хьайтIан ви гьиссерикай къизгъин тир,
Зи руьгь вавай гьич садрани къакъатдач.
Зи сураллай пак накьвариз теменар
Гуз атайла вун шехьмир чан, кIаниди.
Чан аламаз кьисмет тахьай беденар
РикIел хкиз зун негьмир чан, багъриди.
Тахсир зид туш, тахсир залум кьисмет я,
Тагай чаз югъ санал жедай уьмуьрда.
Ам кьисмет туш, ам хифет я, зиллет я,
Акъат тийир гьич сурани фикирдай.
Анжах са кар, на, азизди, рикIел хуьх,
Зи ашкъидин сагьиб вун тир датIана.
Ваз минет я, зи шикил на гъилел хуьх,
ГьакI килигиз, анжах умуд атIана.