Амач йифер за вав рахаз акъудай,
Акунач заз ви гьиссерин къизгъинвал.
Вахт хьанайтIа чаз беденар агуддай,
Заз чир жедай бахтлувилин ширинвал.
Сефил я зун, вун галачиз ялгъуз я,
Садрани за вакай умуд атIузвач.
РикIяй за гьисс ийизва – зун бахтсуз я,
Анжах и гаф мецелай за лугьузвач.
Йикъар физва, йифер физва, къушар хьиз,
Лув гузавай, цIакулар таз мукара.
Заз акI я хьи, вун къвезва зи къаншардиз,
Чи суьгьбетрин шагьид хьайи мулкарай.
Са вахтара мани лугьуз датIана,
Рехъ ганачир на зи рикIе тIалариз.
Бес вучиз къе хушунал сур атIана,
Алахънава ракъуриз зун ахвариз?