Гатфарин югъ мугьман хьана Алемдиз
Са гуьзел хьиз, атай садра кIвализ зи.
Цаварилай ракъурнавай мелгьем хьиз
Экв гун патал, хкахьзавай рикIиз зи.
Зун шадзава тIебиатдин суьретдал,
Гьунарлувал аквазва заз Аллагьдин.
Дамахдачни гуьрчегвилин девлетдал?!
ГьикI тарифдач икьван багьа шабагьдин.
Шаир, шад хьухь! - лугьузва заз Къастуни,
На ви илгьам къужахда яхъ, гуьлуьшан.
Ашкъидини худ гузва пак тостуниз
Тахьуй лугьуз гатфарин югъ перишан...
Назиквилив ацIана рикI хабарсуз,
Са легьзеда рагъ куькIвена рикIера.
Зун шадзавай, заз кеф гузвай кьадарсуз,
За кIелзавай шиир адан вилерай.
Рагъ хъфена, гатфарин югъ къакъатна,
Нубатдин йиф эвичIна мад чилерал.
Бирдан цавуз нурлу гъетер акъатна:
Ахварзава за Халикьдин гъилерал.
Йисар фида... Къадамра заз уьмуьрдин,
Шад легьзеяр белки мадни аквада...
А вахтунда акур хьтин суьгьуьрдин
Гатфарин югъ, заз бажагьат ахквада.