Чи векилри жавабдарвал гьиссзавач,
Чеб майданриз экъечIиз гьакI кисзава.
Къе лезги чIал авай гьал лап писзава,
Уях хьухь куьн чIал паталди, Лезгияр.
Баку пата лезгидин кIвал чIур хьана,
Ватандикай гъурбат хьана, сур хьана,
Миллетчийри ацукьнавай тахтуна,
Тахсир квачир лезги тIварцIиз кIур гана.
Баку пата лезгидин гьал къумбар туш,
Къарагъ эллер, гьакъикъат я, ахвар туш,
Зибур, рикIе миллетдин тIал акьуна,
Акъатзавай эвер гун я, чIалар туш.
Баку пата лезги чIалал рахазмач,
Къадагъа я, лезги макьам къугъвазмач,
Кисиз жезвач завай лугьун тавуна,
Лезги хуьре лезги адет аквазмач…
Гьинва лагь куьн? Чахъ кьегьалар амачни?
ЧIалан къайгъу чIугвадай кас авачни?
Чахъ Шарвили, Гьажи Давут галачни?
Жаваб це тIун чIал паталди, Лезгияр.
Такьат аваз чун ажуз я, кIевева,
Кьве пад хьанвай миллетдин гьай рикIеваз,
Хайи чIал хуьн гьар лезгидин хивева,
ВикIегь хьухь куьн чIал паталди, Лезгияр.
Чахъ Эминни чахъ Сулейман хьанатIа,
Чаз Халикьди къагьриманар ганатIа,
Чи дамарра лезги иви аватIа,
Гаф сад ийин чIал паталди, Лезгияр.
Зи чIал гъед я, ам садрани хкахьдач,
Зи миллетни гьич къуватдай аватдач,
Чи дережа мадни виниз акъатда,
Сад хьайитIа чIал паталди, Лезгияр.