Шумуд инсан дуьньяд винел шехьзава,
Сад мекьила, сад гишила ксузва.
Сада вичин рик1евай т1ал эхзава,
Садан вилер накъваривди ац1узва.
Шумуд диде баладиз гур фу акваз,
Хана ахвар йифералди зегьметдик.
Къекъвемир дуст гьамиша тик жув акваз,
Сад Аллагьдин акатда вун лянетдик.
Шехьзавайдан накъвар михьа, куьмек це,
Малайикри вал гьамиша дамахрай.
Кесиб инсан к1вализ гъана хуьрек це,
Акъудур рик1 намердвилин къармахрай.
Вунни инсан, гьатда белки кьарада,
Ширин дуьнья туькьуьл жеда рик1из ви.
Вазни куьмек ахквада гьа арада,
Тфу гудач, яргъи авур гъилиз ви.