СтIал Мислимат
ЧЕХИ АГЪА УЬЛКВЕДИН
Къарагъ кIвачел! Къе дуьньяда къал ава…
Цав хъуткьуриз рахух, Агъа уьлкведин!
Чахъ, гьар садахъ, хзан, кесиб кIвал ава...
Вегьемир чун кIвачик, Агъа уьлкведин.
Са хзан я инсанар чи еридин,
Несилриз чун гьарма ятIан(и), виридан
Даях хьана, гьам дакIан, гьам кIанидан,
Гьахъ паталди рахух, Агъа уьлкведин.
Чун са чилин, са дамардин чанар я.
Са ивидин, са бегьердин тIурар я…
И дуьньядин магълуб тежер крар я…
ТуькIуьра чи буйругъ, Агъа уьлкведин.
Зун Мислимат я, ваз и чIал кхьейди,
Дяведин цIуз зегьметда чан вегьейди,
Вилел накъвар алаз, югъ-йиф ишейди…
Къаламир чаз зулум, Агъа уьлкведин!
1996-йис.