СтIал Мислимат
ЖЕМИР, ИНСАН, КЪУПАРАН
Буй-бухахдиз гьикьван гъвечIи хьайитIан,
Инсан чилин иеси хьиз аквада.
Цавун аршдай, катра хьиз, лув гайитIан.
Марфад тIинкI хьиз, са къуз чили чIугвада.
Жемир, инсан,хам тарлан хьиз, къупаран.
Са тIвар я ви вахтуналди амукьдай.
Гьа тIварни тур на дуьньядал аваран,
Фана тахьуй, накьан югъ хьиз, тамукьдай.
Ал- Ярагъи, Куьре Мелик … виш сарин
Яхадавай якъутар я, нур алай.
ТIварарихъ нур жеда ахьтин ксарин,
Душмандиз кам тежер, кIубан, зур алай.
Садбур ава бала хьана йикъазни-
Файдасузар, чилин майва пучзавай.
Гьа сад хьиз тир авачизни авазни,
Квел чан гъана и дуьньяди вучзавай?