СтIал МИСЛИМАТ
«КЪАВУМАР»
Етим Эминан «Къавум» шиирдин
бинедаллаз кхьенвай сегьне
Къавумбег:
«Уста лачин, хабар хьухь,
Къе ви кIвализ къведа чун.
Къецин къалай гатIунна,
Кьвед кьве къавум жеда чун.»
(Югъ рагъдандихъ элкъвейла,
КIвалин ракIар гатана,
Салам гана, къецелай
Са пуд илчи атана.
Рак ахъайна, къецелай:
«Ша, ша…»- лугьуз, теклифна.
Дамах-чагъдив илчияр
Устад кIвализ илифна.)
«Агакьнавай жегьилар
Бахтлу хьурай, къавум, чи.
Кьве къавумни сад хьана,
Тамамарин и буржи».
(Салам, хвеш-беш авуна,
ТIуьнар-хъунар куьтягьна,
Гафар давам хъувуна,
Пул эхцигун темягьна.
ЦIуд манатдин къизил пул
Эцигайла суфрадал,
«Жедач, жедач!»- лагьана,-
Лачина, пул аквадалд.
Уста-Лачин:
—Пуд виш манат къизил-пул!
Кими тушиз кепекни!
Вад гьер, гъери, амайбур…
Гьа къайда я герекди.
(Гафар кIватIна, къарагъна,
Рази хьана, лагьайвал.
Лачина мад лагьана:)
—Мехъер жез хьуй лап мукьвал!
Ирид жуьре далдамар
Гъваш зи рушан мехъерал.
Ягъиз вичи макьамар,
РикI алайд я кьуьлерал…
Къавумбег:
«Сагърай! Сагърай, къавумар!
Пакадлай чи мехъер я.
Кутаз чIехи шабашар,
Жедайбур чахъ кьуьлер я!..»
(Мехъер хьана, алатна…
Чамрай гьарай акъатна…
Къавум Уста-Лачинав
КичIез-регъуьз агатна:)
«Свас я, лугьуз, на вуч гана?
Ам са къара мал я, къавум.
Пул къачун ви метлеб хьана,
ЧIур хьайид зи кIвал я, къавум.»
Уста-Лачин:
—Руш гайила ваз, кIвал ацIай,
Им вуч ван я, къвезвай къецяй?
Рахаз наши гафар кьацIай,
Вак квайди вуч къал я, къавум?
Къавумбег:
«Гаф лагьайла, алкIиз цлав,
Жуван чанда акьаз ялав,
Атайла зун вичин къвалав,
Жегьеннемдин цIай я, къавум.
Уста-Лачин:
Акурла ви иски пекер,
ИчIи кIатIар, кесиб кIвалер,
Кар аватIа, вахъ вуч иер,
Лагь, курди ви кIвал я, къавум.
Къавумбег:
«Вуна лугьур чIехи крар…
Бедлем тахьуй гьакI чи тIварар.
Гьалал хьуй ваз гайи малар,
Вид вал аманат я, къавум.»
Уста-Лачин:
Хкваш кIвализ, за гайивал,
Аламаз хьуй рангни вичел.
Зар-зиба, пек, кIвачел-кьилел,
Акварвал са гьал, я къавум.
Къавумбег:
«Дуьз кьве гаф лагь, Уста-Лачин,
Вуч чIуру я, кафир, ви чин?
Уьмуьр куьруь хьуй ман вичин.
Ам заз гайи тIал я, къавум».
Уста-Лачин:
За ваз гайид хенде тушир,
За ам агъзур шивдихъ гучир.
Ая адан къимет ваз чир,
Зун вавди пис къал я, къавум.
Къавумбег:
«Амач адахъ я зи темягь,
Гафар-чIалар ая куьтягь.
Базардиз твах на ви метягь,
Маса фидай кал я, къавум».
*Къавумбегдин гафар Етим Эминан «Къавум» шиирдай къачунвайбур я. Уста-Лачинан гафар авторди алава хъувунва.