СтIал МИСЛИМАТ
МУБАРАК!
Гатфар хьана, тIебиатдик чан кутур,
Гьар дереда чар гьавизрик ван кутур...
Ватанэгьли гъвечIи-чIехи багьабур,
Шад межлисар, суварар квез мубарак!
Гьар са алим, доктор, регьбер Ватандин,
Сагъламвилин дидардавай инсандин,
Агалкьунар артухзавай йис-сандин,
А зурба тир гьунарар квез мубарак!
ЭкъечIзавай кьакьан ирид цавариз,
Баркалла чи игит картар лувариз.
Уьтквемвилелд тамамзавай крариз,
Ватандин мерд рухваяр квез мубарак!
Ван ацалтна кIвахьиз дагъдин кьацIарай,
ЭкъечIзавай лезги чилин яцIарай,
Бере, къубу агъмиш хьанва вацIарай...
Каспи гьуьлуьн бегьерар квез мубарак!
Эл ава чахъ агъзур чIалал рахадай,
ЭкъечIнавай са хурудин яхадай.
ВацI къалайла, физ, уламда акьадай,
Игит картар, маралар квез мубарак!
Уьлкве хуьзвай са яракьни галачиз,
Са зеррени дяве, къал-къиж авачиз,
Михьи я чун, душманвилер амачиз,
Ислягь вахар, стхаяр квез мубарак!
Кьуьд алатна, гуьзел гатфар атана,
Чилерихъай кьарадин ял атIана,
Ша, азизбур, межлис кутур, атана...
Сад хъижезвай уьлквеяр квез мубарак!
1982