Куьгьне дустар, санал авур шадвилер,
Кьери жезва кьилел алай чIарар хьиз.
Дустар такваз, зайиф хьунвай фад вилер,
Кьуьзуь жезва, емиш гъайи тарар хьиз.
Дустарикай чIехи паяр амачиз,
Жув-жувакай куьлягь жезва, тек хьана.
Са бязибур заз шикилрай тамашиз,
Карагзава, вилерикай экв хьана.
Куьгьне дустар кьери жезва къвердавай,
ЦIийибур кьаз бес кьадардин вахт амач.
Яшар хьана, беден назик жердавай,
ЦIийи дустар кьан хъийидай бахт амач.
Гьич садазни кIандач, кьена, чара жез,
Вуч ийида, тIебиатдин шартIар тир?
Зун девлетлу кас тир, дустар пара жез,
Закай шаир авурбур зи дустар тир.
Амач Межид, Алирзани, Жамидин,
Къадир, Салигь, Абдурагьман, Шамсудин
Шииратдин стхаяр тир ивидин,
Сад Аллагьди икI завай фад къакъудин?
Вафалу тир дустар, гьелбет мад ава,
Зал алай чан гьа дустарин даях я.
Шииратдин захъ бегьердин гад ава,
Гьар са дуст зи са чешмедин булах я.
Дустар, дустар, шииратдин къардашар,
Кьейибуруз – рагьмет, сагърай амайбур!
Зи къиметлу, зи гьуьрметлу юлдашар,
Куь дуствилин сирер я зав гумайбур!