Къизилдин таж кІандач рикІиз тарифдин,
Адал цацар жеда кьилиз акьахдай.
Къуьхуьнарни кІандач пехил арифдин,
Гафаралди хер ийиз, кьел алахдай.
И дуьнья халкь хьайидалай гуьгъуьниз,
Гьи кьадардин арифдарар атана?
Нече шумуд садан дабан эгъуьниз,
Чаз Аллагьди гайи ризкьи атІана.
Къизилдин таж кІандач рикІиз тарифдин,
Ам залан я кІвалах ийиз, гваз къекъвез.
Шаир хьунухь бес я кесиб синифдин,
А чешмедай илгьам къачуз, хъваз къекъвез.
ХъуьтІуьн йикьни къвен тийизвай гъилерай,
Бегьемсузрин кІвенкІвер жеда мецерал.
Вун акъудиз на эцигай кІвалерай,
Фитне-гъибет ийиз жеда къецерал.
Къизилдин таж – гьар са кІватІал чІалар я.
Шадвалер гъиз кхьей меле, мехъерик.
Буш рахунар – гьакІан цацар-валар я,
ТІвал хуькуьрдай ацукьайла руьхъверик.
Заз Эминан, Сулейманан булахрай,
Абукевсер хъвадай чІехи бахт ава.
Пехил дустар кIамай кьадар алахърай,
Захъ Аллагьди багъишнавай тахт ава.
Къизилдин таж – чІалар я за аялриз,
Теснифнавай лайлаярни манияр.
Мурад я зи дерин хьунухь хиялриз,
ЧІалар, бахшар кхьидайла, кІани яр.
Сажидин гьуьл я ацІанвай сабурдив,
Шуькуьр хьурай Сад Аллагьдин кьадардиз.
Тухуз алахъ жуван парар абурдив,
Пехил ксар чеб аватда дагьардиз.