Шиир яргъи, мана-метлеб дерин я,
К1елчидин гьал ам к1елайла серин я,
Шаир, вучиз Зул ваз акьван так1ан я,
Аквар гьалда, вун са яшлу инсан я.
Хъипи хьанвай зурзазват1ан пешерни,
А къизилдин рап-рап хуш я вилериз,
Циф ак1ана сефил ят1ан чилерни,
Тух ахварар жеда яргъи йифериз.
Къуй дурнаяр куьч хъухьурай яргъариз,
Чи мулкариз гатфарихъди хутурай,
Десте-десте лув гузвай ц1иргъ халкьариз,
Къуй дат1ана вили цава акурай!
Эхь, чилериз рагъ зулузни герек я,
Нурари чим герен кьванни чук1уррай,
Магьсул, бегьер к1ват1ализ чун гьелек я,
Мел-мехъерри гежел хуьрер ч1агуррай.
Вуч къведат1а , лагь , дигмиш хьай емишдив,
Цуькни хъархъар фад кьурада, кит1ида,
К1анибуру къекъвез аста еришдив,
Зулуз сейрда анжах и кар кьат1ида.
Гагь шагьвардив мирги гъалар къугъуриз,
Гагь ч1уриз чин, сел ракъуриз къастунал,
Устадвилел шумуд сегьне къалуриз,
Ша, буюр, Зул, ацукь жуван тахтунал! Дак1ан я заз зул
Шахмардан Арран
Дак1ан я заз зулун йикъар, дак1ан я,
Кьуьзуь жезва т1ебиатни инсан хьиз.
Дак1ан я заз зулун йикъар, дак1ан я,
Ч1улав цифер пехъи жезва душман хьиз.
Хъипи хьана зурзазава пешерни,
Са ажаиб фул къвезава зи чандиз,
Секин хьанва гургурзавай селлерни,
Гуьзел гатфар мус хкведа ватандиз?
Ц1ийи к1урук1- т1ебиатдин жегьилвал
Тухъуьнзавай ц1айни экв заз дак1ан я!
Зулун йикъар - т1ебиатдин сефилвал
Ашкъ ргазвай рик1из гатфар хъсан я!
Дурнайрин куьч яргъи жезва дат1ана,
Са легьзеда хиял цавуз акъатиз,
Чилин винел уьмуьрдин ч1ил ат1ана
К1анда зазни а дестедик акатиз.
Ракъинин нур са геренда хъфизва
Чилик чими нефес акат тавунмаз.
Демер, мелер яргъал физвач, чк1изва
Вилик иер рушар агат тавунмаз.
Бул бегьерар зулун йикъан гьунар туш,
Гатфарини гату ч1угай нахиш я.
Ярдин тариф ийин садран гунагь туш,
К1урук1завай к1анивилин алкъиш я.
Зулун юкъуз даим патав амукьдай
Гьар са касдиз иер са ЦУЬК жагъурай!
К1анивал хьуй ц1ай рик1ерик кумукьдай,
Куь уьмуьрда, бахтуна зул тахьурай!
Вичи вич чаз гагь гатфар хьиз къалуриз,
Пакаман югъ хъуьт1уьн югъ хьиз яман я.
Са сегьнедал агъзур макьам акъудиз,
Дак1ан я заз зулун йикъар, дак1ан я.