ВОДАР ІГЛІЦЫ
Сцюдзёная ноч
Над знямелай палянай.
Нячэпаны снег
Пад бухматай сасной.
Загадкавы водар
Ігліцы духмянай.
Марознай зімы
Непаўторны настой.
Мы цэлую вечнасць
Хацелі сустрэцца.
Насустрач ішлі
Праз туман і снягі.
І вось адбылося!
Мы разам нарэшце.
Сышліся ў надзеі
Пазбыцца тугі.
Распальваем вогнік.
У лесе зімовым
І мне і табе
Так патрэбна цяпло.
Вяртаецца радасць,
Знаходзяцца словы…
І цемра густая
Цяпер, як святло!
11 лістапада 2013