Авач живер, янава жанг,
Хъуьт1уьн эхир мукьвал ала.
Физ-хквезва зун к1валахал,
Цмур дере яргъал ала.
Шегьре рехъ я, пакаман фад,
Хуьрер гьеле ксанма,
Лаз к1уьк1везвай цавун хунча
Гъетеривди ац1анма.
Физва машин, дак1ардилай
Алудиз жезвач вилер,
Махарай ят1 тамар, чуьллер,
Къван квай гуьнеяр, рекьер...
Гимишдин рангунин ц1ап1рап1!
Шуьшедин нур виринрай!
Т1ебиатдин гуьзел шикил
Кьат1изва за деринрай.
Ричал-судин чешмед булах,
Алагуьзли хайи пад,
Цмур, Цнал, Гачал, Цлахъ,
Таниш хьунал я зун шад!